Sirata E Nduata E
Sampur Naipirita
Ramatare E Suom
O Sipata O
Mpaash Natii
Nicnhe Te
Nkitubularoto
E Nkula E
Suom Enche O
Nkingurata E
Parakuoisho
Te Nkidapash E
Ntokitin Naitayia
Nkai
KEISULAKI/KEPONIKI REKIE LENKISHON AANG
NKINGURATA E PARAKUOSHO NATII ATUA
NKITOBIRUNOT ENKAI ANAA SII NKOP
Kore lkuak lang naa nabo meoro osuom aang errunkud tiatua lorere
likira. Kore mettii suom aang errunkud naa melulunga tanaa ikinturraitie motua naje elulungaisho elkuak ledupoto o jungore aang, naa
kore metii lkuak lang, naa keyau mpaash e nkitololakinto e ramat esuom
aang errunkud.
Ikimanya nkop nabore parakuosho ee ntimi/nkaitubulu, ngwesi onkae
parakuosho enkop.Kore apa nkulie kwapi naa kebore sii ngwesi naigal
toolorukon, te martin, te ntimi, o taangat kake netodoitie siana tenkaraki siai /ramatare etung’anisho. Kore inia naa hae amu kore yioo
Sampur ikibikoo miakiata nyamali ongwesi naata tipat tonkop pooki
nalulunga atuwuana, Ltomia, Nkoitikoshi, Ntarawueti/Nkoliin, Nkisino,
Nkinyanchurri o Suyiani. Kore sii tenkalo ngojitin neematieki nkariak naa
itum nkweeny sapuki naijo Nkaitolia, onkulie sii atuwuana Lmagiron.
Kore lkumo loloshumpa ooponu aingor ngwesi neshil lkuaak lang naa
keshamaa sii nicnhe murdaisho onkitobirat E Nkai napaapaasha.
Ikiata sii nkitanapat elkuak lang naingor nkop peyie meitarrorri, kore
tenkitanyanyukoto, kore te kunda netumo Lturrurr loo Sampur te Loisukutan otejo ninche kore tenkaraki naatumi te ntim, neata ntim tipat
amu ketumieki, Lnganayio, naisho e lotoro, nkare, ngwesi o tipatisho
enye te ndaata esuom, keyiere peyie eitodoroponu nyata enye, naa ilo
turrurr oichoru ngamata nabolokini suom nkujita.
Kore lwenet lang naa keretu nkirritata esuom aang errunkud naata tipat nemeyau goloto lwenet loo ngwesi entim.ikiata sii yioo sipata anaa
mpaash nikibikie kiasishore lkuaak lang oitubulaa nkiasisho esuom aang
errunkud tenkoitei nabikoo, kinyokita nkingurata enkop.
IKIRA LAATAK LENGENO ELKUAK LANG NARAMATITAI
NKITANAPAT AANG
Ketubulua ngeno aang tengamata naado neloito kwe asipaii/abulu terisioroto nikinangare ltirmami. Ikiata ngeno sapuk naworo uni: ngeno ebiotisho esuom,nkittubularoto enkula esuom, oningunoto/yielounoto enkop, inia naisho iyioo mateyiai nkare, nkujit e suom aang, naa kore ana
ngeno epaapaasha meatae nemeirishakino nkae.
6
Ngeno e Nkitomoyia esuom: kore apake teparra naa ikintomoyiaite suom aang temoyiaritin, onkulie kibisiong kiasishore ngeno nikiata te lkeek oobulu too martin o tee ntimi. Kore oleng naa keitomuai
lewa Nkishu neingor ngorio ntare, keyiolongorio aitomoyia nkerra aang
naanyokuo, kake medupa nkitomoyia/mbaata enche te nkerra edopa
– aa taa nkerra nena neemara nerrunkud aang tenkaraki keata nena
kerra yiounot naaje enche tanaa losegin obakieki/oitomoyieki. Ikiata sii