Keitodolu naa ajo keirony nkolong, o moyiaritin nemeidim aashom
nkador, kore sii nkae, ikiata taa ngeno nikibarunyie nikintomoyie anaa
nikibakie suom naainguaa atua yioo temusano, nikiyasishore te suom
aang errunkud, naa mikiata losegin leramat le kuna suom eaulo naayeuaki, neisho yioo mairishakinoto retot olkiliku leramat onguaa aulo.
Ikiramat sii Ngiron, Ntamesi O ldein.Tiniyieu niyielou nkumo naa ingura
mpalai napudakino ana nasira siana te ‘ Appendix I’
Nkirishakinoto esuom; Kore te larin kumo naa ikirishakinete suom, kimatita kule, lodo nikinya nkiri teengamat naayiere. Kore etesheta lkumo
lang nkangiete parnati, kewuon ake eiwuotwuot lkumo taa ngamat ayiaya ndaata esuom nadupa, o nkare nepaashare sii lmangati.
Kore tenkaraki keidikidiko lameitin te locho le Kenya, ikidol aajo meidim
kuna suom nainguaa aulo aairisha lameitin. Kore epoito nkula e aulo
aarrek suom aang, kidol aajo keitowuanaa rishata aang nikipoyie kwe
aabikoo anaa apake.
Sirata E Nduata E
Sampur Naipirita
Ramatare E Suom
O Sipata O
Mpaash Natii
Nicnhe Te
Nkitubularoto
E Nkula E
Suom Enche O
Nkingurata E
Parakuoisho
Te Nkidapash E
Ntokitin Naitayia
Nkai
KEATA SUOM AANG ERRUNKUD TIPATISHO TE LKUAAK
LANG
Kore metii murdaisho nabikoo naisho yioo suom aang, keata sii mpaash
etipat tiatua lkuaak lang, tanaa nikidol te mbaa naijo kuna;
Kore te lokop naa keatae Lmarei oji Lmasula naa ninye lekwe te ntasimi naa kear niche tekwe Lmongo le ntasim neboloki nkulie dapan
sapa ee lokop metara sii ninche peyie emurati likae laji.
Kore emurati layiok, naa keitewuenieki layiok nkilani ee nkerra
naanyokuoo aang shiake.
Kore anaa naabo embaa nayieuni te nkiyema naa keyiere peyie eyiaya loyemisho nkerr nasho nanyokie- nautu inia nyokenisho, neata
nkiyiaa naadoo o nkonyek supati, neisho taa paker enye neimalie ajo
paker, neyiengi taa nkae ker enkiyema aitoki.
Keishori nkabartani mala nabore lata nateyieruaki te nkidongoe enker aang ‘nanyokie’ nemat kule naitai lmaguret nepik lmoo le nkang
naloito, neel sesen lenye te lata peyie elak sesen lenye apik nanau
enkosheke.
Kore teneini nkerai naa keyiengi nker naji moor naa kore teneper
ltungani neyelieki lata nkutuk enye aisho nkanyit nelo yeata mayian.
Kore sii teneyiangakini Lmuran naa kegeluni mua nabo e suomi nasho, tenemuai si Ltungani, neyiengakini suomi napir, naata
nkonyek. Keatai sii Lmongo osipa-osho, neitainyieki Lchoni lenye Lkerreti naa kesipa pee eshamaa lorere pooki era bioto.
Kore siake yeasishoreki suom nakuro nkula, keshamari aisul kuna aang
apake nemeata nkula eishinga.
5